Gabaasa Qeerroo Mudde 19,2014 Jimmaa Horroo 

Gabaasa Qeerroo Qellem, Jimmaa Horroo, Muddee 19/2014 Mootummaan Wayyaanee yeroon filannoo jala gahetti misooma barnoota jedhee hafarsuudhaan uummata Oromoon carraa filatamuutiif jecha miidiyaadhaan halkanii guyyaa hafarsaa jira.

Yuuniversitiilee Oromiyaa keessatti baayinaan sadarkaa duraa ol dabaluudhaaf mootummaan baajata guddaa dabalee jira utuu jedhee miidiyaadhaan qaamonni miidiyaa isaatii ololanii gama biraadhaan uummata keessatti ammo barattootni rakkoo hanqina meeshaatiin barumsa dhabanii miidhamaa kan jiran keessattuu barattootni godina Qellem, Jimma Horroo irraa barattootni kutaa 11 fi 12 baratan dhimma barnootaan wal qabsiisanii gaaffii kaasaa jiran, miidiyaaleen mootummaa wayyaanee sodaa fi garaa isaaniif jecha oduu sobaa kan dubbatan, yeroo ammaa uummata biratti kan hubatamee jiruudha, gama barnootaan mootummaan hanga gandaatti baajata guddaa ramadee deggersa barnootaaf kennaa jira kan jedhan barattoota mana barumsaa qophaayinaa Jimmaa Horroo irraa barataniif ammo rakkinoota hanqina meeshaa manni barumsaa qabu guuttachuudhaaf tokkoon tokkoon barataa qarshii 370 kennuu qaba jechuudhaan barattootatti dirqamni kan gadii bu’e torbe kana keessa tahuun isaa gabaani Qeerroo aanaa Jimmaa Horroo irraa ibsa

Kanumaan wal qabatee Muddee 18 irraa kaasanii barattootni kutaa 11 fi 12 baratan mootummaan gama biraadhaan baajata guddaa baaseen misooma barnootaa Oromiyaa keessatti babal’isa, barataan meeshaa guutuudhaan barachuun dirqama isa kanaf ammoo baajatni guddaan ramadamuu isaa miidiyaa isaanii of harkaa qabaniin kan dubbataa jiran haala dhokataa uummanni hin beekneen ammoo barataa irraa qarshii funaanee kaayyoo jedhee olole san guuttachuudhaaf adeemaa jira, isa kanaaf mootummaan akkuma ololaa jiru san baajata san gadi fidee meeshaa san nuuf guutuu qaba, kana tahuu baannan barumsa hin barannu, qarshiin nu gaafattan hannaaf, duudhaa mootummaa irraa oolchuudhaaf malee faayidaa keenya ykns kan uummataa miti mootummaan maaliif uummata sobaa? Hanqina meeshaas utuu qabnu dorgommii barattoota biraa waliin galuu hin dandeenyu jedhanii barumsa dhaabaa kan jiran tahuu gabaasni Qeerroo nu gahe addeessa.

Uummanni mootummaan erga of hin dandeenye, gadi haa dhiisu kan hojjetuuf kennuu qaba aangicha, meeshaa barnootaa nan guuta jedhee erga dubbachuu eegalee waggaa meeqa, har’a uummataa fi barataa homaa hin qabne irraa maal barbaada mootummaan tahus hanga kana karaa miidiyaa isaanii nu sobuun maalii jechuudhaan uummannis barataa deggeruu isaa , barattootnis barumsa barachaa kan hin jirre tahuu gabaasni Qeerroo nu gahe addeessa.

   Gaaffileen Artistoota Magaala Shaashimannetti Marii Taasifamaa Jiruun Ka’an!

Mootummaan naannoo Oromiyaa yeroo ammaa waajjiraalee aadaa fi tuurizimii tahuudhaan Atistoota Oromoo Oromiyaa keessaa walitti sassaabuudhaan guyyaa 10f Muddee 15 irraa kaasee Adaamaa galma Abbaa Gadaa fi Arsii Shaashimanneetti gaggeessaa jiraachuun gabaasnee jirra. Marii taasifamaa jiru kana irratti gaaffilee hedduun Artistoota irraa ka’aa jiru hedduudha, kan Adaamaa galma Abbaa Gadaatti taa’amaa jiru gaaffiilee ka’an gabaasuun keenya kan yaadatamuu fi marii magaala Shaashimanneetti Artistootaan taa’amaa jiru irraa gaaffilee muraasa ka’aa jiru kanaa gaditti kan argamuudha.

1. Mootummaan dhalataa Amaaraa waliin tokkummaa akka qabaannu ni barbaada. Miidhaan Habashaan dur uummata keenya irraan gahaa ture keessa keenyaa hin badne har’a mootummaan akkamiin isaan waliin tokkummaa uumaa jiraadhaa jedhaa?
2. Dhimma Sportiif Dr Mulaatuun yeroo gara Bahardar deeme isaan irratti iyyanii kan jeeqan ijoolleen Amaaraa namni kun waan oromoo taheefiidha. Presedaantiin naannoo tokkoo maaliif hin kabajamu? Warra Amaaraa biratti uummanni oromoo ammas taanan jaallatamaa hin jiru isa kanaaf dhimma isaan waliin tokkummaa uumuu jedhu irratti walii galtee hin qabnu !!
3. Minilik qaamaan yoo jiraachuu baateyyuu suuraa isaa fuudhanii kan naannowan minilikiin kan bakka bu’ee jiru ammayyuu jira,namni kun diina Oromoo waan taheef kana arguu hin barbaannu kanaaf isaan irratti tarkaanfii mootummaan maaliif hin fudhatuu?
4. Oromoodhaaf kan falma hadhawaa taasisaa ture ABO dha, ABOn sababa keessaniif biyyaa bahe,har’a taanan ABOn seenaa guddaa qaba,OPDOn seenaa barreeffame maal qabaa? Seenaa maalii hojjettanii?
5. Misooma misooma jettanii kan miidiyaa keessaniin kan ololtan waan mul’ataa fi quubsaa uummanni keenya argee hin beeku Itoophiyaan ammayyuu daaraa uffattee jirti, maqaa sobaan hanga yoomitti daldaltuu?
6. Minilik isaa uummata oromoo miidhaa ture,ajjeesaa ture, saniif weellistoonni amaaraa sirbaafii jiru, nuti gootota keenyaaf gaafa sirbinu maaliif gara siyaasaatti lakkaawamaa? Kan isaanii maaliif siyaasatti hin ilaalamuu?
7. OPDO fi ABOn Oromoodha, saba oromootiif dhaabbatani, isaan kun lamaan maaliif waliin hon sochoonee? Maaliif isaan lamaaniif biyyi kennamee hin bulchin?
8. Mootummaan misooma irratti bobbahee hojjetu yoo jiraateef misoomni biyya keessa jiraachuutti ni amanna turre,dirqamaanis haatahu alaabaa Federaalaa fudhanneerra,warri amaaraa garuu ammayyuu alaabaa godaannisa leencaa qabu fudhatanii naannawu,maaliif isaani irratti tarkaanfiin hin fudhatamuu? Erga taheemmoo isaanis maaliif tokkummaa sabaa fi sab-lammootaatti hin amananiree?
9. Uummata Oromoo keessa beekaan baayeedha, muummicha ministeeraa maaliif tahuu hin dandeenye oromoon?
10. Dhimma waraanaa irratti Oromoon ajajaa jeneraalotaa tahee hin hojjetuu?

Kan jedhuun gaaffilee guyyaa mari eegalan irraa kaasee ka’aa jiran qabxiiwwan ijoo tahan gaafachuun waan gabaasa nu gahe irraa hubatamaa jira, haaluma kanaan ammallee kan itti fuee jiruudha. Gabaasa dabalataan walitti deebina!

Gaaffii fi Yaada Artistoota Irraa Ka’an

Muddee 15/2014 irraa kaasee mootummaan naannoo Oromiyaa waajjira aadaa fi tuurizimii waliin tahudhaan seenaa mootota darbanii kaasuudhaan mootummaa amma aangoo of harkaa qabu mootummaa wayyaanee waliin wal madaalchisuuf, gocha mootota darbanii hammeenyatti, gocha mootummaa wayyaanee ammoo gaaritti lakkaawuudhaaf aartistoota Oromoo,muuziqeessota, weellistoota, ogeessota dhuunfaa Adaamaa, galma Abbaa Gadaatti walgayii teesisuudhaan marii eegalanii jiran irratti gaaffiin ka’aa jiraachuun gabaasuun keenya ni yaadatama. Artistooni galma kanatti walgayii kana irratti hirmaataa jiran kan Adaamaa nama 203 yoo tahu,naannoo Arsii Shaashimannee irratti gaggeeffamaa kan jiru namoota 480n mariin godhamaa jira,gabaasni ammatti nu gahee jiru kan Adaamaa yoo tahu, gabaasa haala marii kan Shaashimannee haala nu qaqqabeen kan dabarsinuudha. Guyyaa walgayiin kun eegalee kaasee gaaffii fi yaadotni hedduun Artistoota kana irraa ka’aa jiru Adaamaa, Galma Abbaa Gadaa irratti;wal duraa duubaan akka kana gadiiti:

1. OPDOn uummata oromoof dhaabbate osoo hin taanee uumatatu OPDO dhaaf dhaabbate, dhugaatti uummata oromoof utuu dhaabbattanii maalif ilmaan oromoo mana hidhaatti dhumti? Maalif barataan keenya gaaffii mirgaa gaafateen rasaasan rukutama? Qabeenyi oromiyaa maaliif ormaan dhuunfatamaa? Lafti qote bulaa keenyas maaliif gurguramaa?
2. Dhaaba OPDO kan bu’uressee obbo Mallasaadhaa?
3. Bilisummaa ni fedha uummanni oromoo, uummata oromoof dhaabbattanii bilisummaa saba keesaniif fiduu hin dandeenye, bilisummaan saba oromoo kan eegamu ABO irraati, kanaaf ABO maaliif hadheessituu? Uummatini birmadummaa isin irraa eegaa hin jiru….
4. OPDOn saba oromoo bakka bu’uudhaaf gahumsaa fi haamilee maaliif dhabee?
5. Addi Bilisa Baasaa Tigraay(TPLF) waan isin bu’ureesseef akka barbaade isin taasisaa jiraa?
6. OPDOn kan hundeeffameef uummata oromoo ittiin qabachuudhaaf malee aangoon itti kennamuuf miti, TPLFn lolee dhufee as gahee aangoo of harka galche,mootummaa wayyaaneef faayidaa taatan malee uummataaf faayidaa maalii hin taane OPDOn?
7. Itti seensa marii keenyaa fi kaayyoodhumti keessaniyyuu waayee mootota Haayila Sillaasee fi Minilikiidha, moototni kun uummata Itoophiyaatiif bu’aa buusan osoo hin taanee uummata biyyatti fixan, miidhan, moototni kun maqaan isaani leellifamuun maaliifii? Mootummaan har’aas isaan irraa maaliin adda tahaa? Maqaa isaanii waamuun hanga yoomitti itti fufaa?
8. Waayee ijaarsa OPDO yeroo kaafamu maqaan obbo Mallasaa biraa hin hafu, sababni isaa maalii?
9. Biyyattii keessatti hucuu siivilii uffachuudhaan kan lubbuu ilmaan namaa ajjeessaa jiru irratti mootummaan yaada maalii qabaa?
10. OPDOn waggaa 23 Artistoota oromoo walitti qabee waliin marii gaggeessuun isaa maal kaayyeffateetii?
11. Itiyoophiyoomuu keenya nu gochuu hin dandeessan nuti oromoodha, akka oromummaa keenyaatti maaliif hin jiraannu? Akka Itoophiyummaatti akka yaadnu maaliif barbaadduu? Lagni Abbaay jettanii amma waamtan uummanni oromoo dur kan itti beeku laga Mormoritti amma maaliif maqaa jijjirtanii? Dhimma laga Abbaayiif hirmaachuu kan nu dhorke waayee Itoophiymmaa fi jijjiirraa maqichaati, nuti Itoophiyaadha yoo ofiin jenneyyuu uummanni biyyattiii dhuguma nu amanaa?
12. Artistootni oromoo, rakkoon keenya inni guddaan, rakkoo diinagdeeti.sababa kanaaf ammo sochii jabaa goonee akka hin hojjenneef ammoo kan nu godhe kaabinoota OPDOti.
13. Nuti Artistoonni oromoo isin waliin akka hiriirru yoo feetan, waan uummanni oromoo gaafataa jiruuf deebii haqaa kennaa, gumaacha barbaachisaa sana keessaniif bahaa, wayyaaneedhaan waanni uummata miidhu yoo isinitti kenname bu’aa garaa keessanii fi taayitaaf jettanii nutti hin dhufinaa?
14. ABOn uummata oromoo gidduutti waan uummata daqiiqaadhaaf gaddisisu hojjetee hin beeku, dhugaadhaaf waan falmeef ammo isin biratti yakkamaa tahe, bara dhufaa darbu, bakka wal gayiitti ABOn shororkeessa jettanii uummata biratti yakkuun arraba kana dubbatuuf guyyaan tokko deebiin haqaa akka jiru hin hubannee? Mee ABOn maal godhee? Har’as taanan uummata biratti jaallatamaadha jibbamaan isinii, humnumaan jiraachaa jirtu, garaa keessaniif maaliif dhaaba tokko yakkituu?

• Dhimma ABO ilaalchisee gaaffii gaggeessitoota waltajjii saniin Artistoota gaafatame:- ABOn har’a biyya keessa hin jiru, har’a biyya keessatti ABOn isinumaadha, waanABOn biyya biraa irraa dirqama gadi buuse hojiitti hiikaa jirtu, agarsiisa garagaraatiin uummata ABOf ijaartu, bakka ABOnjirutti nama tooftaadhaan ergitu,ABO biyya alaatti deggeraa jirtu, bosonattis nyaachisaa hin jirtanii?

15. ABO maqaa hadheessuu itti fuftanii boodarraan waan dhufu isinuu arguuf jirtu jechuudhaan hanga guyyaa har’aatti gaaffiin gafatamaa fi yaadni ka’aa ture kanaan goolabamee kan jiruudha.

Waltajjii marii kana irratti miseensota koree giddu gala OPDO irraa ergamanii Artistoota kana kan mariyachiisaa jiran:

1. Mohaammad Ahimad Qophee-Miseensa paarlaamaa fi presedaantii Oromiyaatti waajjira aadaa fi gorsaa uummataati.
2. Musxafaa-presedaantii Oromiyaatti, itti gaafatamaa wal quunnamtii uummataati.
3. Isheetuu Dasee-koree giddu gala OPDO gaaffilee Artistoota irraa ka’aa jiraniif deebii kennuuf kan ergameedha.

Gaaffiin isaanii haaluma kanaan kan itti fufuudha. Gabaasa isaa waliin jirra kan biroon ammoo Shaashimannee irrattis Artistoota walii gala nama 480n gaggeeffamaa jira gama kanaanis Qeerroon qindeessee ni gabaasa.

Gabaasa Qeerroo Finfinnee, Muddee 18,2014
FDG biyyattii keessatti kallattii adda addaan finiinaa jira, barataan Oromoo gaaffii mirgaa dhiyeessuun, manneen barnootaa olaanoo fi godinaalee garagaraa rakkoolee yeroo ammaa mootummaa Wayyaaneen uummata irra gahaa jiruun wal qbatee diddaan ka’aa jira. Gaaffiin mirgaa Yuuniversitii Madda Walaabuu keessatti dhalate akkasuma Mattuu Yuuniversitii keessatti kan itti fufee jiru haaluma kanaan Yuuniversitiilee biroo keessatti kan itti fufaa jiruudha.

Diddaa wal irraa hin citne, gaaffiidhuma wal fakkaatu, hoji maleeyyiin yerooammaa wal qindeessuudhaan mootummaa Wayyaanee irratti hiriiruun gaaffii kaasuuf kan deemaa jiran kaleessa gabaasun keenya kan yaadatamuudha, diddaan kan jabaatee jiru amma barataa irraa gara uummataa fi barataa hojii dhabee magaala Finfinnee keessa jiraatuun finiinaa kan jiruudha, haatahu malee mootummaan Wayyaanee uummata gaaffii mirgaa gaafatu maqaa shororkeessota jechuudhaan humna waraanaa ramaduudhaan sochii barataa fi uummataa dura dhaabbata, kun guyyuudhaan mootummaan Wayyaanee humna isaatti fayadamee wagga lakkaawataa jiruudha.

Guyyaa har’aa magaala Finfinnee naannoo hoj-dhabdoonni itti hedduummatanitti humna waraana isaa ramadee jira, kan akka Lagahar, Kiiloo 4, Piyaasaa jedhaman keessatti ganama kana humni waraana Wayyaanee ramadamee socho’aa jiraachuu suuraa argame waliin gabaasni isaa addeessa. Gaaffiin hoji maleeyyii gara gaaffii mirgaatti naannahuu taha jechuudhaan waan shakkuuf mootummaan wayyaanee akka amala isaa humna waraana isaatti fayadamaa jira,kana irraan kan ka’e diddaan gama kanaan eegaluudhaaf ture humna bittimneessaa wayyaaneen adda bahanii jiraachuu fi walumaa galatti mootummaan wayyaanee naannoo adda addaatti haala garagaraan gaaffiin ka’aa waan jiruuf, diddaa wal hidhataanis mooraa barnootaa keessatti mul’atee jiru yuuniversitiilee keessatti barumsi dhaabbatee barattootni nyaata lagachuudhaan fonqolcha mootummaa Wayyaanee irratti hiriiruu jabeessanii wan argamanii baratas tahe uummanni Oromoo walitti dhufeenyaan, wal gurmeessuu keessatti waan sodaatuuf tikoota isaa naannolee yuuniversitii, koollejjii,fi bakka uummanni Oromoo heddumattutti qubachiisaa jira

Gabaasa Qeerroo Kolleejjii Barsiisota Jimmaa

Mudde 17,2014 Mootummaan abbaa Irree Wayyaanee EPRDF/TPLF Gootota barattoota Oromoo Koollejjii barsiisota Jimmaa 8 irratti karaa dabballoota ergamtoota isaa FDG qindeessa jirtu jechuun biiroo bulchiinsa Koolleejji barsiisota Jimmaatti waamuun doorsise jira.

Isin rakkoo ilaalcha qabdu jechuun biiroo bulchiinsa koollejjichaa fi biiroo presidentii koolleejjii barsiisota Jimmaa ”Abbaa Zinaab Abbaa Olii” kan jedhamuutti waamamuun badii tokko malee maqaa ilaalchaan fallaa mootummaa keenya jirtu jechuun doorsifni humna olii erga irratti gaggessanii booda, barnoota irraas ni arii’amtu jechuun badii tokko akeekachiisi cimaan itti kennamee jira.

Haala kanaan Barattootni Oromoo Oromummaan yakkamuun dararaman kunneen kanneen maqaan isaanii  akka armaan gaditti eeramedha.

1. Barataa Gulummaa Lammii mummee  Ingiliffaa waggaa 3ffaa
2. Barataa Ababaa Gudee  mummee baranoota biology waggaa 3ffaa
3. Barataa Taddalaa Taarikuu mummee barboota herreega. waggaa 3ffaa
4. 4.Barataa Asaffaa Dhugumaa mummee barnoota Heregaa waggaa 3ffaa

5.Barataa Qaqqabaa Humneessaa mummee herreegaa waggaa 3ffaa

6. Barataa Abarraa Dheeressaa mummee herreegaa waggaa 3ffaa
7. Barataa Asaffaa Dhugumaa mummee Keemistirii Waggaa 3ffaa
8. bBarataa Tokkummaa Hundee mummee herreegaa waggaa 3ffaa kanneen keessatti argaman barattootni Oromoo 8 sababaa Oromummaa isanii qofaan kollejjii barsiisota Jimmaa keessatti doorsifamuun akekkachifni dhumaa barnoota irraa arii’amtu, FDG nurratti gaggeessa jirtu jechuun qorannoon bulchiinsa Koolleejjii Barsiisota Jimmaa fi humna basaasaa fi dabballee TPLF nama maqaan ‘Taarikuu’ jedhamuun doorsifamuun ibsame jira. Goototni barattootni Oromoo doorsifni fi hiraarsi diinaan nurratti godhamu kun takkaa illee kayyoo keenya irraa duubatti nu deebisuu hin danda’u, warraqsaa FDG ni jabeessa malee laffisuu akka hin dandeenye hubachiisuun dargaggootni Oromoo bakka hundaa FDG jabeessuun abbaa irree wayyaanee of irraa qaaarisuu qabna  dhaamsa jajjabina dabarsan.

Gabaasa Qeerroo Haromayaa,Mudde 18,2014

Guyyaa gaafa Mudde 16,2014 Mooraa Yuuniversitii Haromaayaa keessatti barruuleen uumata Oromoo hadheessanii fi qorqalbii cabsan maxxanfamuu irraan baratooti Oromoo gaaffii mirga Oromoo kaasan. Haala kanaan barattooti Oromoo naannoo Mana Kitaabaa ( Library) itti wal qindeessuun sagalee diddaa dhageessifatan. Kun kana ta’aa osoo jiruu battalatti humni waraana Wayyaanee bakka irraa dhufe hin beekamne mooraa guutuu naannawuu fi baratattoota Oromoo doorsisuun akka isaan diddaa dhaabanii fi naannoo san irraa bittinfaman gadi jabeessanii akeekachiisuun dirqiin barattoota gaaffii isaanii dhaabanii ofii mooricha dhuufantanii jiru.

Haalli kun kanaan hin dhaabbante gabaasa dabalata Qeerroon booda irra ni dhiheessa.

Gabaasa Qeerroo, Muddee 17, Finfinnee Irraa
Yeroodhaa yerootti akkuma gabaasni dhiyaataa jiru Oromiya keessatti barattootni sabboontotni Oromoo gaaffi mirgaa kan abbaa biyyuummaa kaasuun diddaa finiinsaa jiraachuun dhagayamaa jira.

Gaaffiwwan mirgaa kaánii diddaan jabaachuudhaan mootummaa Wayyaanee yeroo ammaa lafa seenu dhabeera, kallattii adda addaa irraan uummannis tahe barataan haala keessa jiruu fi hojii mootummaa Wayyaanee irratti dammaqiinsaan kaée gaaffii dhiyeessuun gaafachuu irratti argamuudhaan mormii dhageesifataa jiru.

Gaafa Muddee 17,2014 qaalaínsa jireenyaa yeroo ammaa biyyattii keessatti mulátaa jiruun uummanni mootummaa irratti gaaffii kaasaa jiraachuun akkasuma Finfinnee keessatti hoji dhabdoonni kumaatamaan lakkaawaman ilmaan Oromoo lakkoofsaan guddaa tahuun waan hubatamaadha. Barataan wagga hedduu barumsa isaa xumure, bara dhufee darbu barataan Yuuniversitii fi koollejji irraa eebbifamee gara maatiitti galuun maatii irratti baáa tahuu mannaa hojii barbaacha magaalaa Finfinnee keessa jiraataa jiru.  

Akka keessa beektoti gabaasanitti bara kana hoj-dhabaan Finfinnee keessa 200,000 ol akka taheedha, keesssatu bara 2014 dachaadhaan kan dabale walumaa gala bara mootummaa Wayyaanee keessa hoj dhabdummaan babaláchuu irraan qaalaíinsi jireenyaa uummata irraas gahaa waan jiruuf dimshaashumatti gaaffiin gama kanaan kaáa jiru mootummaa Wayyaanee hedduu kan yaaddeeseedha, kanumaan hará hoj dhabdoonni wal gurmeessuudhaan mootummaan wayyaanee biyya bulchuu hin daandenye, barataan barumsa booda gara itti deebiú erga hin qabnee biyyattii keessa Yuuniversitii tamsaasuun waan uummataaf yaadu fakkeessee uummata gowomsaa jira. Kanumaan hoji maleeyyiin waggaa sadii ol erga barumsa xumuranii wal gurmeessuudhaan mootummaan Wayyaanee aangoo irraa buú qaba jechuudhaan,kan hin baranne mootummaa keessa taaée qabeenya uummataa saamee jiraata,abbaan qabeenyaa hará qaama mootummaa keessaa kanneen hin baranneedha, kan barate daandii irra jiraatee waan nyaatu dhabee agabuu bula sababaa jedhuun Finfinnee kutaa bulchiinsa Buraayyuu keessatti wal gahuun diddaa dhageessifataa oolanii jiru.