Caamsaa 02,2012 Amboo
Yuunivarsiitii Amboo keessatti mootummaan wayyaanee Barattoota Musliimaa dallaa yuunivarsiitii keessatti akka hin saganne dhorke.Mootummaan wayyaanee bakka barattootni musliimaa itti sagadan(salaatan) naannoo istaadiyeemii bakki kun isinii hin eeyyamamu,yoo isin kan sagaddan taatan warreen kiristaanaafis bakka kennuu waan qabnuuf dhaabaa jedhus barattootni musliimaa amantii keenya bakka barbaadnetti amanachuu dandeenya,Shirri mootummaa wayyaanee hin dalagu jechuun diddaa jabeessuun itti fufanii jiran.

Haaluma wal fakkaatuun Koollejjii Teeknikaa fi Ogummaa qonnaa Alaagee keessatti mootummaan wayyaanee bakka barattootni musliimaa itti sagadan(salaatanitti) xuraa’aa bottee lama fiduun naqanii bakka dhorkatanii jiran.Barattootni musliimaas maaliif kana akka godhan gaafatan deebii dhabuun masgiida koollejjii irraa fagaatu deemuun salaatuuf dirqamanii jiran.

Dhiibbaan Biyyattii keessatti dhimma amantiin dhufaa jiru haalaan hammaachaa dhufuun yeroo ammaa waraanni mootummaa wayyaanee hordoftoota amantii garaa garaa ija siyaasaan ilaalaa jiran!

Caamsaa 02,2012 Laqamte
Uummatni oromoo Godina Wallagga bahaa Aanaa Limmuu,Fiixee bokkoo ganda 06 waraanaa fi tika mootummaa Wayyaanee bobba’uun diddaa dhaabuuf yaalan Caamsaa 1,2012 guyyaa guutuu of irraa ittisan.Uummatni Oromoo naannoo kanaa waan qaban fudhachuun poolisoota mootummaa wayyaanee doorsisaa fi qe’ee irraa buqqisuuf bobba’an tumanii of irraa arii’an.Uummatni Oromoo naannoo kanaa Poolisoota mootummaa Wayyaanee 4 hojii ala kan godhan yoommuu tahu jala deemtota mootummaa Wayyaanee
1. Dafaa Galataa dhimma nageenyaa aanaa Limmuu
2.Abdiisaa Gammadaa Hojjetaa dhimma nageenyaa
3. Abarraa Qorannoo yakkaa aanaa Limmuu
Kan tahan poolisoota guurratanii deeban waliin tumamanii diddaa uummataan naannoo sana irraa ittifamanii jiran.Waraanni Federaalaa mootummaa Wayyaanees uummata naannoo kanaa miidhuuf bobba’us uummatni karaa itti cufuun of irraa ittisaa jira.
Haaluma wal fakkaatuun barattootni Oromoo mana barumsaa
1. M/B Limmuu sad 2ffaa fi qophaa’inaa
2. M/B Barisoo sad 2ffaa
3. M/B Sugee sad 2ffaa
4. M/B Qeelloo sad 2ffaa
5. M/B Qaxaroo sad 2ffaa
Alaabaa ABO fannisuun gaaffiin oromoo haa deebi’u jechuun diddaa jabeessanii jiran.Barsiisotni manneen barnootaa kanneenii fi kanneen biroos diddaa uummataa deemsifamaa jiru kan tumsanii fi adda durummaan kan gaafatan tahuu ibsanii jiran.
Injifannoo uummata oromoof!!

Ebla 30,2012, Qeerroo Adaamaa
Dhiibbaan mootummaan wayyaanee barattoota Oromoo iratti gageessaa jiru ammas kan itti fufe ta’ee kan jiru yoo ta’u bakka buutotni wayyaanee mooraa yuuniversity Adaamaa keessa jiraatan barattoota Oromoo mooricha keessa jiraniin fiilmiwwan Afaan Oromoon gaggeeffamu mooricha keessatti akka hin ilaalmne godhan. Keessumaa Ebla 28/2012 f Fiilmii Afaan Oromoon qophaa’e “HINSEENE”jedhamu ilaalamuuf qophii turban lamaaf godhame guyyaan ilaalamuu kaleessa kan ture fiilmiin kun mooraa yuuniversity kana keessatti ilaalamuu hin qabu kan sabaa fi sab-lamii yoo ta;e male jechuudhaan sabni habashaa yeroo jeequmsa kaasanitti meesholeen kireeffamanii dhufan haa deeni’aniyyuu malee barattootni Oromoo mooricha keessa jiran diddaa isaanii agarsiisuudhaan fiilmiin sun akka ilaalamu ta’eetu jira, isa irraan kan ka’e amma irraa eegalee huccuun aadaa,agarsiisni garagaraa kan Oromoo ilaallatu marti mooricha keessatti akka hin raawwanne ajaja gadi dhiisanii jiru sabni Amaaraa kun,kana hunda sababeeffachuudhaan sabootni Amaaraa kun dhaadannoo garagaraa mooricha keessatti kan akka suuraa Haayila Sillaasee guddisuudhaam mooricha keessatti bakkoota adda addaatti mamaxxansaa akka jiran Qeerroon mooraa Yuuniversitii Adaamaa gabaasa.
Haalli sochii diinonni Oromoo aangoo biyyattii irratti qanitti dhimma bahuun Oromoo irratti dhiibbaa akkasii waan geessisaa jiraniif barattooti Oromoo hamma akeeki qabsoo Oromoo bakka gahee cunqursaan fakkaataa kun nurraa bu’utti qabsoo ni cimisina jedhanii dhaammatanii jiru.
Injifannoon Uummata Oromoof!

Mootummaan Wayyaanee dhimma amantiin wal qabsiisuun uummata Oromoo siyaasa gaggeessitan jechuun miidhaa garaa garaa irraan gahaa jira.Haaluma kanaan Arsii Lixaa aanaa Gada Basaasaa keessatti maangoddoo Sheik Su’id Ahmed jedhaman dabalatee hordoftootni amantii Musliimaa sadii kan ajjeefaman yoommuu tahu Maanguddoon kun rasaasa mootummaa wayyaaneen rukkutamuun Hospitaala Xiqur Ambassaa keessatti du’aa fo Jireenya gidduutti argamu.Hordoftootni amantii Musliimaa fi uummatni naannoo kanaa 200 ol mana hidhaa moootummaa wayyaaneetti sababa kanaan kan ukkaamsaman yoommuu tahan mootummaan wayyaanee waraana hedduu bobbaasuun uummata Godina Baalee fi Arsii kanneen akka Kofalee,Shiraaroo fi Shaashimannee keessaatti karaa nagaa amantii isaanii akka hin gaggeessine gochuu irratti argama.Haaluma wal fakkaatuun Godina Shawaa Lixaa Ijaajjii keessattis dhiibbaan mootummaa wayyaanee irraa hordoftoota amantii kanaa fi kanneen biro irratti dhufaa jiru hammaachuun uummatni rakkachuu irratti argama.
Oduu wal qabateen Godina Iluu Abbaa Booraa fi Magaala Jimmaa keessatti mootummaan wayyaanee basaastota masgiida keessatti ramaduun uummatni karaa nagaa amantii isaa akka hin gaggeessinee fi qulqullummaan amantii isaanii akka hin hordofne gochaa jira.
Magaala Finfinnee fi Godina Harargee bahaa Awwadaay keessattis mootummaan wayyaanee barattootnii fi barsiisotni Awaaliyaa hiriira nagaa bahu sodaa jedhuun federaalota manneen barnootaa Islaamaatti naannessuun eeguu irratti argama.

Ebla 30,2012 Gabaasa Qeerroo Lixa Shawa

Godina Shawaa Lixaa aanaa Abuunaa Dindabaratitti diddaa dargaggoonni Oromoo qabsiisaniin mootummaan Wayyaanee dura dhaabbachuu dadhabee human waraanaa naannoo san turanitti kan biro dabaluun ummataa fi dargaggootaa goolaa turuun Qeerroon aanichaa gabaaan. Mootummaan Wayyaanee waraana isaa bobbaasuun ilmaan Oromoo mana hjidhaatti guuruun furmaata diddaan ittiin dhaabbatu kan itti fakkaate yeroo ta’u,Godinuma Shawaa Lixaa aanaa Abuunaa Gindabarat keessaa dargaggoota mana hidhaatti ukkaamsitee jirti.Yeroo ammaa dargaggootni

1. Laggasaa Damee Ganda Gooroo Furtoo irraa
2. Chaaluu Tolaa ganda Koluu irraa

Waraana mootummaa Wayyaaneen ukkaamsamanii bakka buuteen isaanii dhabanii jiran.Uummatni naannoo kanaa mootummaa Wayyaaneen yeroodhaa yerootti doorsifamaa kan jiranii fi galgala bilisaan deemuu dhorkamanii akka jiran gabaafame.

Qabsoon itti fufa! Gabrummaan ni kufa!

Ebla 30,2012 Mattuu

Mootummaa Wayyaanee waliin walitti hidhata godhachuun qabeenya dinagdee guddaan kan sosso’uu fi ilmaan Oromoo yeroodhaa gara yerootti saamuu fi akka sabaattis eenyummaa Oromoo xiqqeessee tuffachuun jiraattota naannoo kan rakkisaa ture invesiterri Abashaa yeroo adda addaatti gochaa hammeenyaa kana irraa akka dhaabbatee ummata Oromoof kabajaa akka kennuu qabuuf gorfamaa fi akeekkachiifamaa kan ture lammiin Habashaa Habtaamuu Muuyii jedhamu gocha isaa irraa dhaabbachuu didnaan Godina Iluu Abbaa Booraa aanaa Mattuu ganda Seeddoo keessatti uummatni Oromoo itti yaa’uun reebanii qabeenya isaas bittinsanii jiran.Qabeenyaa nama kanaa kan tahe suuqiilee gurguddaa inni qabu diiguun magaazina bunaa guddaa buna kuntaala hedduu baatee kan ture jalaa kan bittinsan yoommuu tahu Habashoonni ummata Oromoo kabajuu hanqachuun tuffii fi arrabsoon biyya Oromiyaa irra jiraachuu akka hin dandeenye dhaamsa dabarsaniifii jiru. Kanneen kaanis godhchaa akkasii dalaguu fi mirga ummata Oromoo dura kan dhaabbatu jiraannaan tarkaanfiin wal fakkaataan akka isaan eeggatus hubachiisanii jiru.

(Qeerroo, Naqamatee, 29 Ebla 2012) Saamamuu lafa abbootii Oromoo, ajjeefamuu saba Oromoo, reebamuu fi ariyatamuu, rasaasaan tumamuu ilmaan Oromoo  sababeeffachuudhaan qeerroon magaalaa Leeqaa Naqamtee fi mooraa Yuuniversitii Wallaggaa keessa baratan walitti dhufuudhaan wal gayii gabaabaa adeemsisuudhaan ejjennoo qaban lafa kaayatanii jiru.

Akkasumas miseensoti Qeerroo itti dabaluun dhaamsa dabarsan keessatti qabsoo Bilisummaa Oromoo karaa hundaan gargaaruuf  waadaa waliif seenuudhaan qabsootti akka jabaatan murteeffatanii jiran.