Gabaasa Qeerroo Bitootessa 21,2015 Jimmaa

 Warraaqsii FDG Goototni dargaggootni barattootni Oromoo Yuuniversiitii Jimmaa qabsiisan daran jabaachuun guyyaa kaleessa hanga gaaffiin mirga fi dimookiraasii gaafachaa jirru deebii argatuttii jechuun nyaataa fi barnoota dhaabuun diddaa isanii ibsacha kan jiran yoo ta’u,  Guyyaa hardhaa Bitootessa 21,2015  immoo goototni barattootni Oromoo Yuunivarsiitii Jimmaa Mooraa Yuunibarsiitii keessa gadi akka hin baane humna poolisa federaalaa fi humnota tikaa Wayyaaneen  ittifamuun eeggichi  guddaan irratti gaggeeffama jira.  Barruuleen warraaqsa FDG’s magaalaa Jimmaa fi Mattuu keessatti guyyaa har’aa irree Qeerroo barattoota Oromoon facaafame, qabxiilee Armaan gadii of irraa qaba.

1. Mirgootni dimookiraasii fi Mirgi namummaa uummata keenyaaf haa kabajamu.
2. Doorsifnii  humna poolisaa ,tikaa fi waraana wayyaaneen nurratti godhamaa jiru nurraa dhaabbachuu qaba.
3. Sakkatta’insii mooraa Yuunibarsiitii irra kaa’ame kaafamu qaba.
4. Filmaata sobaa dura gaaffii keenyaaf deebiin nuuf kennamuu qaba.
5. Oromiyaa keessatti bosonnii Uumamaa fi warshaleen akka Warshaa suukara Fincaa’aa ibiddaan barbadeeffama jiru, tokkummaan kaanee balaa ibiddaa Mootummaan wayyaanee qabeenyaa Oromiyaatti qabsiisee haa dhaamsinu, Mootummaan Wayyaanee yakka kanaaf gaafatamuu qaba.
6. Dimookiraasiin hin jiru, Mootummaan EPRDF abbaa irree Afrikaa Bahaati.
7. Uummatni Oromoo Oromummaan Yakkamee hidhatti ukkaanfame gaaffii tokko malee haa hiikaman.
8. Mootummaan Wayyaanee EPRDF/TPLF/OPDO’n yakka ajjeechaa,hidhaa fi baranoota irraa arii’achaa turan seeratti dhiyaachuu qabu.
9. Abbay Tsahayee angawaan TPLF/EPRDF kan ta’ee yakkamaan saba keenyaa arrabsee fi eenyuummaa uummata keenya balfe angoo gadhiisuun yakka dugugginsa snyii oromiyaa keessatti gaggeeffamaa jiruuf seeratti dhiyaachuu qaba.
10. Master Plan Finfinnee guutummaatti haqamuu qaba.
11. Oromoo qe’ee fi qabeenyaa irraa buqqisuun dhaabbachuu qaba.
12. Hanga Mootummaan abbaa irree Wayyaanee angoo gadi lakkisutti FDG jabaatee itti fufa. Warraaqsa karaa nagaa fi dimookiraasii gaggeessa jirru jabeessinee karaa nagaa fi Dimookiraasii addunyaatti iyyachuu fi abbaa irree wayyaanee dura dhaabbachuun jabaatee itti fufa barruun jedhu bittinneeffama jira.

Gama biraan Paartiin mormituu KFO kun Guyyaa har’aa wayita Magaalaa Jimmaa hanga  Mattuutti duula na filadhaa gaggeessa jiranitti barruulee sagantaa ejjennoo KFO ibsu facaasuun ittumaa mootummaa wayyaanee dhiphinaa fi muddama guddaa keessa galchan. Mootummaan Wayyaanee humnoota tikaa, dabballootaa fi waraana isaa bobbaasuun barruulee warraaqsaa na filadhaa paartiin kun facaasaa jiru, funaanuu fi akka uummatni bahee hin fudhannee fi hin dubbifneef yaalii guddaa godhan iyyuu humni uummataa humna Wayyaanee ol itti ta’uun uummatni barruulee warraaqsa FDG Qeerroon bilisummaa Oromoo facaasaa jiruu fi barruu duula na filadhaa KFO faacaasaa jiru argachuun dubbisee waliif daddabarsa jira.

Gabaasa Qeerroo Bitootessa 21,2015

Mootummaan Wayyaanee dhaaba ofii bixxile DH.D.U.O kan ulee TPLF tahee Uummata Oromoo rukkutaa asiin gahee amma bututaa jiru haaromsuudhaaf wixineewwan garaa garaa qopheessite. Kana keessaas Asrtistootni Oromoo maqaa Do’ii siidaa Calanqoo jedhuun naannoo sanatti akkka argaman qindeessite. Artistootnis Siidaan Calanqoo siidaa seenaa qabeessa tahee fi Gaaffii Uummata Oromoo tahuu waan beekaniif naannoo sana daawwachuuf deeman. Haa tahu malee aangawootni OPDO fi TPLF Ayyaana kabaja DH.D.U.O Waliin walitti qabsiisuudhaan Ayyaana DH.D.U.O kabajaa jirra wayita jedhanitti Uummatnii fi Artistootni nuyi DH.D.U.O jedhamu hin beeknu, Maqaan DH.D.U.O waltajjii irratti dubbatamnaan jeequmsa uumamuuf itti gaafatamni Wayyaaneedha jechuun diddaa eegalan.

TPLF Fi DH.D.U.On waranaan kan tikfamaa jiru waltajjiitti bahuudhaan Olola DH.D.U.O fi Kabaja Ayyaana ishee dubbii eegalan. Uummatni dhagaa fi waan harkaa qabuun rukkutuudhaan aangawoota mootummaa, Kabaja ayyaana DH.D.U.O fi Jala deemtota ishee salphisee jira. Kabajni Ayyaana DH.D.U.O Calanqootti karoorfames fashaluu isaatiin Wayyaaneen dhiphinaa fi salphina keessa seentee jirti.

Bitootessa 19,2015 Gabaasa Qeerroo Ebantuu 

Fincilli Diddaa Gabrummaa Guraandhala 27 irraa eegalee hanga Guyyaa har`aa Bitootessa 19,2015 tti itti fufee jira.

Diddaan Bitootessa 18-19 ,2015 deemeen  magaalaa fi manneen barnootaa irratti alaabaan ABO bakka bakkatti maxxanfamuu fi fannifamuun wal qabatee uumannii fi barattooti gamtaan ka’uun FDG magaala guutuu keessatti gaggeefamaa jira. Haalli kun gara malee kan isa rifachiisee fi naasise mootummaan Wayyaanee loltoota isaa magaalaa Naqamtee fi bakka adda addaa irraa gara sanatti bobbaasuun hojjettoota mootummaa fi barattoota sadarlaa 2ffaa baratan hedduu mana hidhaa hin beekamnetti funaanee geessee jira. Haga ammaatti Barsiisotaa fi barattoota 30 ol hidhaman keessaa hammi tokko maqaan isaanii:-

Barsiisoti hidhaman

1. Warquu Tarrafaa Barsiisaa  mana barumsaa Qeelloo
2. Taammiruu  Hinsarmuu Barsiisaa mana  barumsaa Qeelloo
3. Tashoomaa asaffaa Barsiisaa mana  barumsaa Qeelloo

Barattooti mana marumsaa sadarkaa 2ffaa Qeelloo irraa hidhaman

1. Biqilaa Raggaasaa barataa Kutaa 10ffaa mana  barumsaa Qeelloo
2. Lateeraa Gammachuu barataa Kutaa 10ffaa mana barumsaa Qeelloo
3. Gumuzee  Galataa barataa Yuunversiitii Mattuu irraa maatii gaafachuuf galee kan  hidhame
4. Jireenyaa Galataa barataa kutaa 10ffaa mana barumsaa Qeelloo
5. Daawit Dassee barataa kutaa 9ffaa mana barumsaa Qeelloo
6. Abdannaa  Dassuu barataa Kutaa 8ffaa mana barumsaa Qeelloo
7. Daawuti Fiqaaduu barataa kutaa 8ffaa mana barumsaa Qeelloo
8. Getaanee Lamuu barataa kutaa 7ffaa mana barumsaa Qeelloo
9. Fayyeeraa Mallasaa barataa kutaa 7ffaa mana barumsaa Qeelloo
10. Gumuzee Dhinsaa Dargaggoo jiraataa magaalaa Qeelloo
11. Dhaabaa Toleeraa Dargaggoo jiraataa magaalaa Qeelloo
12. Fiqiruu Taaddasaa dargaggoo jiraataa magaalaa Qeelloo

Namootni maqaan isaanii  armaan olitti tarreeffame kun yeroo ammaa yakkaa fi badii tokko malee  Oromummaa isaanii qofaan yakkamuun Barumaa isaanii irraa ukkaanfamanii qee fi bakka jireenya isaanii hin beekamne.

Gabaasa Qeerroo Aliboo Bito,19,2015

Godina Wallagga, Horroo Guduruu Wallaggaa aanaa Jaardagaa Jaartee keessatti duula na filadhaa gaggeeffamaa jiruun wal qabatee dura taa’aan mana Barumsaa Aliboo kan qophaa’inaa fi itti aanaan mana barumsichaa hojii irraa arii’amanii jiran. Hoogganaan mana barumsaa Obbo Amantee Raggaasaa fi itti aanaan mana barumsichaa Obbo Addunyaa Irreessoo kanneen jedhaman isin FDG deemsifamaa jiru keessaa qooda qabdu, barattootni akka fincilan kan kakaasu isini maqaa jedhuun yakkamanii hojii irraa arii’aman. Hooggana mana barumsaa kanaas Obbo Tasfaayee Yaadataa kan jedhamu bakka buusuu isaanii maddeen qeerroo gabaasanii jiran.

Mootummaan Wayyaanee FDG deemsifamaa jirutti kan baaragde hojjettoota magaala kanaa 12 armaan dura FDG deemsifame waliin dhimmi wal qabateen hojii irraa arii’uun ishees ni yaadatama.

Gabaasa Qeerroo Jimmaa Bitootessa 20,2015

Bitootessaa 19,2015 Goototni Barattootni Oromoo Yuunibarsiitii Jimmaa FDG qabsiisan jabeessuun gaaffii mirgaa fi dimookiraasii karaa nagaa dhiyeeffachaa jiraniif deebii sirriin nuuf kennamu qaba malee doorsifnii waraanaa, humnota tikaa fi poolisootaan nurratti godhama jiru deebii ta’uu hin danda’u nurraa dhaabbachuu qaba jechuun guyyaa har’aa fincila nyaata lagachuu itti fufan.

Goototni daragaggootni barattootni Oromoo Yuunibarsiitii Jimmaa gaaffii mirgaa fi dimookiraasii karaa nagaa dhiyeeffachaa jirruuf doorsifni humna tikaa wayyaanee fi waraanaa nurratti gaggeeffamaa jiru deebii ta’uu hin danda’uu,jechuun fincila nyaata lagachuu fi barnoota lagachuun itti fufan, gaaffii keenyaaf warrii biyya bulchina jechaa Oromoo ajjeesisaa, hidhatti guursisaa fi dhiiga ilmaan Oromoo irraa dhaabachuun mootummaan keenya dimookiraatawaadha jechuun Filmaata sobaa wayyaanee keessatti hirmaachuun waan qabanii gadhiisan dhabaa jiran kanneen akka :

1. Muktaar Kadir dhufee Gaaffii keenyaaf Deebii kennuu qaba.

2. Dr Kabaa Urgeessaa deetaan ministeera barnootaa presidentiin Yuunibarsiitii Jimmaa duraanii kan turee fi Yeroo amma kanatti mootummaa wayyaanee bakka bu’uun filannoo kijibaa Wayyaanee keessatti qooda fudhachuun wayyaanee Oromoo hidhaa, ajjeesaa, fi barattoota Oromoo barnoota irraa arii’achaa jiru bakka bu’uun miseensa mana maree bakka bu’ota uummataaf dorgomaa wayyaanee ta’uun kan duula filannoo gaggeessaa jiru, yeroo gabaabaa keessatti argamuun gaaffii mirgaa fi dimookiraasii gaafachaa jirruuf deebii kennuu qaba jechuun barattootni Oromoo FDG nyaata lagachuun guyyaa har’aa jabeessuun itti fufan. Mootummaan wayyaanes Barattoota Oromoo qaroo qabeeyyii fi abdii uummataa ta’an doorsisuu fi waraanaa fi humna tikaa of harkaa qabuun doorsisuu itti fufe. Suuraan attach ta’e kun suuraa barattoota Oromoo nyaataa fi barnoota dhaabuun gaaffii mirgaa abbaa biyyuummaaf deebiin nuuf kennamuu qaba jechuun qabsoo warraaqsa FDG itti fufani jiranidha.

photo0770

photo0766

photo0767

photo0771

photo0772

photo0765 001

photo07701

Gabaasa Qeerroo Bitootessa 19,2015

Shaggar Lixaatti:Aanaa Dirree magaala Incinnii mana barumsaa dadarkaa 2ffaa Bitootessa gaafa 19/2015 barattootni 2000 tahan ganama akka mana barumsaa seenaniin ganda Balaay Rogee Daagaa jedhamu bosonni gaara Dashuu jedhamu ibiddaan gubataa waan jiruuf sochii ibidda kana dhaamsuuf barattootni kun taasisan, duula bosona kana balaa ibiddaa jalaa baasuuf jecha godhan dhaadannoo fi sirboota qabsoo garagaraa dhageessisaa, mootummaan Wayyaanee qabeenya Oromiyaa ibiddaan gubaa jira, kanaaf duula mootummaan taasisaa jiru kana dura haa dhabbannu jechuudhaan sagalee isaanii dhageessisaa kan turan, gaaffiin dhimma kanaa bakka hundaatti ka’aa waan jiruufis mootummaan humna poolisaa fi tikaa bobbaasee gaaffii barattootaa dhaamsuuf duula bane jira.

Diddaa, Gabaasa Qeerroo Bitootessa 19,2015

Dhaabbilee barnootaa Yuuniversitii, koollejjii, godinaalee oromiyaa naannoo adda addaatti FDG gaaffii dhimma gubachuu bosona Oromiyaa, dubbii  Abbaa Tsaayee fi mirga walabumaa Oromiyaaf falmuun wal qabsiisudhaan Qeerroon Oromiyaa keessatti diddaan ka’ee jira, bakka gabaasa Qeerroo ibsu irraa kana gaditti kan argamuudha.

1. Haromayyaa Yuuniversitii:-

   

   Mooraa yuuniversitii guddicha Haromayyaatti Bitootessa gaafa 18/2015 dhaabaa ibsaa fi manaa irratti barruu mata dureen isaa “Sabboontotni Oromoo FDGf Kaaffee keenya Keessatti Ganama Sa’a 7:30 Irratti Wal Arguun Dhaamsa Dabarsina” jedhuun dhaadannoolee qabxii 8 qabu waliin bakka garagaraatti maxxanfamee bule odeessi Qeerroo yoo addeessu, dhaadannoon qabxiidhaan maxxanfamanis

• Bosonni oromiyaa mootumma wayyaaneetiin gubachaa jira,manca’aa jira
• Ilmaan Oromoo yoo xiqqaate 35,000 ol mana hidhaa keessaa gadhiifamuu qabu,
• Barattoota ajjeefamaniii fi hidhamaniif mormii keenya itti fufuu qabna
• Poolisiin federaalaa mooraa keessaa haa bahu
• Mirgi diimokiraa fi uummataa haa eegamu
• Kaardii filannoo sobaa hin fudhannu
• Abbaay Tshaayee uummata oromoo arrabsuun seeraan gaafatamuu qaba
• Maqaan Master Pilaanii kana booda ka’uu hin qabu.

Kan jedhu dhaadannowwan kanaa olii kana mooraa keesatti bittimsuun humni waraana wayyaanee gubbaadhaa socho’uun kaleessa naannoo fi keessa mooraa Yuuniversitii Haromayyaa buufatee akka jiru odeessaan Qeerroo addeessa. Barattootnis nyaata kaaffee lagachuudhaan barumsas dhaabuun kan beekame, humni ittisa biyyaa sochii barattootaa kana dhaamsuuf garasitti ergame diddaa barattootaa dhaamsuu akka hin dandeenye odeessaan ibsa.

2. Yuuniversitii Jimmaa:-

   Akuma beekamu yeroo darbe sadarkaa itti aanaa fi gorsaan mootummaa Itoophiyaa kan ta’an Abbaay Tsaahe dhimma Master Pilaanii dubbiin afaanii baafate ilmaan oromoo kamuu jalaa dhokataa miti,kanumaan kan wal qabate diddaan mooraa barnootaa yuuniversitii oromiyaa keessa jiru mara keessatti dhimma qabeenyaa oromiyaa gubataa fi manca’aa jirus dabalatee gaaffiin ka’aa akka jirus odeessa Qeerroon darbaa jira, haala kanaan kaleessa Bitootessa 18/2015 yuuniversitii Jimmaa mooraa Kiitoo Fardiisaa(Engineering Compus) jedhamee kan beekamu, mana yaalaa barattootaa moorichaa keessatti Qeerroodhaan barruun afaan Oromoo fi afaan Ingiliffaatii fuula 9 qabu mata duree “Master Pilaaniin Hojii Irra Ooluu Hin Qabu fi Dubbii Obbo Abaay Tsahe Dubbates Tuffii Uummata Oromoo Akka Tahe” keessattis waamicha diddaa kan ibsu barruun kun bakka namni argu lama lafa kaa’amee jira, jalee mootummaatiin argamee yeroodhaan toohatame malee mooraa yuuniversiti keessatti barruu hedduun akka maxxanfamee jiru Qeerroon odeessa isaa nuun gaha,kanumaan mootummaan wayyaanee mooraan xiyyeeffannoo guddaadhaan akka eegamu,humna ittisaa mijeeffachaa mooraa Yuuniversitii sana qofaaf mijeeffachaa akka jiru odeessaan Qeerroo addeessa. Akka Yuuniversitii Jimmaatti mootummaan sodaa guddaa keessa seeneera, barataan Oromoo diddaadhaaf of qopheessee akka jiru hubachuu irraan, barruuleen waamichaas mumul’aa waan jiraniif hordoffii jabeeffachuun karoorfata, haaluma kana fakkaatuun guyyaa har’aas barattootni mooraa keessatti sochii diddaa mul’isuun dhagayamee jira, diddaan itti fufuu qaba.

3. Adagirat Yuuniversitii:

   Gaafiin mooraa Yuuniversitii kanatti ka’ee jiru dhimma amantaan kan wal qabate tahullee barattootni Oromoo heddumminaan keessatti gaaffii miidhaan saba Oromoo kaasuun, gubachuu bosonaa fi warshaalee Oromoo keessa jiranis kaasuudhaan gaaffii barattootaa gara gaaffii mirgaatti naannessanii guyyoota lamaan kana jechuun Bitootessa 17 fi 18 barumsi dhaabbatee akka jiru odeessaan Qeerroo gamasii addeessaa jira. Barumsas akka hin baranne Oromiyaan boca uumamashee mootummaa Wayyaanen utuu gadhisaa jirtuu, ilmaan Oromoo mana hidhaatti osoo gidirfamuu jireenya dhuunfaa keenyaaf barumsa kennee lafa dhiituun haa dhaabbatu jechuun diddaan mooraa kanattis qabatee akka jiru odeessi nugahee jira.

4. Naannoo Wallootti:-

   Aanaa Gudayaa ganda Konkaa Ijaa jedhamau Bitootessa gaafa 15 fi 19 /2015 mootummaa irraa ergamee hojii basaastummaa aanaa kana keessatti kan hojjetu dhalootaan Amaara kan tahe tokko nama dhalootaan oromoo tokko sabboonummaa qabu harka mootummaatti dabarseekennuu irraan tarkaanfiin ajjechaa basaasaa mootummaa wayyaanee kana irratti raawwatamee jira. sababa kanaan manneen jireenyaa saba amaaraa 4 ol tahus ibiddaan gubateera,diina mootummaan ergamee uummata hammeenyaaf kennaa jiru kana irratti boombiinis darbatamee namoonni hedduun mada’anii jiru, odeessa Qeerroo hubatamu irraa uummanni tarkaanfii mootummaa wayyaanee irratti fudhachuu eegalee jira,deggertootni mootummaas sodaa kana keessa seenuudhaan hojii isaanii irraa akka deebi’aa jiran dhalootaan saba biraa kan tahan, ilmaan habashaa hojii diinummaa irratti bobbahanii jiranis naannoo sana irraa uummataan ariyamaa akka jiran odeessi Qeerroo addeessa.