Amajjii 07,2013 Finfinnee

FDG Barattoota Yuniversitii Finfinnee Moraa  Daalattii (Kiloo4) Keessatti baatii Jalqaba 2013 irratti eegale hanga ammaa osoo hin qabanaawiin diddaan kun mooraalee kaanitti darbee akka jiru beekama. Reebichi,hidhaanii fi ajjeechaan barattoota Oromoo irra gahe Qeerroo Yuniversitiilee biyyatti keessa jiran kaan akka garaa gubee dheekkamsiise ifaa dha.

Mootummaan Wayyaanee soda kana irraa kan ka’e biyyattii keessatti tasgabbii dhabuun addatti ammo naannoo Finfinnee keessatti jeeqamee ummatas jeeqaa jira. Diddaa kana waliin wal qabatee

Hidhataa fi waraanni Wayyaanee mooraa kiiloo 4,5 fi 6 akkasuma koollejjiwwan Finfinnee keessatti argamu dhuunfatuun marsanii meeshaa waraanaan barataa qalama malee hin qabne eegaa jiru. Haalli kun yeroo aduun dhihu halkan ammo caalaatti humna waraanaa fi meeshaan ammayyaan barattoota doorsisuuf mooraa Yuniversitiilee akka qubsuma waraanaatti fayyadamaa jiru. Basaasota barataa fakkaatee barsaasus doormii mara irra hiraa jiru.

1. Daangaalee  magaalaa Finfinnee mara irratti konkolaataa dhaabsisanii kan Finfinnee keessaa bahuu fi kan Finfinneetti galu tokko tokkoon waan namni baatu korojoos haata’u kiisitti  qabeenya dhuunfaa baadhatee deemu sakatt’aa jiru.
2. Waraqaan eenyummaa ummati baadhatee deemu kan haara’e tahuu baannaan too’annoo jala galuudhaan qoratamuu fi hiraarfamuutti argamu.Addatti ammo namni Oromoo ta’e martii fi kan afaan Oromoo dubbatu guutuutti shakkamaa ta’ee ilaalama.
3.  Hanguma hiraarri ummata Oromoo irra gahaa jirus barattooti Oromoo Qeerroon waraqaa diddaa gabrummaa magaalotaa fi bakkoota ummanni heddumminaan jiran keessatti baldhinaan facaasaa fi raabsamaa kan jiru ta’uu,haalli kunis Wayyaanee caalaatti yaaddessuu irra darbee soda guddaa keessa naqee akka jiru beekama.
4. Oromoonni humna P. Federaalaa keessaa hojjetan gariin waan barattoota Oromoo irra gahaa jiru miidhaa gara malee ta’uu hubachuun tumsa Qeerroof qaban taasisaa jiraachuu.
5. Galmeelee caasaa mootummaa keessaa miidhaa Oromoo irra gahaa jiru baasanii caasaa Qeerroon gahuu fi adeemsa mootummichi farra nagaa fi dimokraasii ta’uu kan muldhisu dabarsanii kennuu isaaniiti.

Walumaa gala haalli kanneenii fi kkf naannoo Finifnnee keessatti deemaa jiraachuu Qeerroon gabaasa.

Qabsoon itti fufa! Gabrummaan ni kufa!

Amajjii 07,2012 Amboo

Diddaan barattoota Yuunivarsiitii  Finfinneetti dhalate jabaachaa dhufuun qeerroo yuunivarsiitii Amboon itti fufe.Mootummaan wayyaanee diddaa barattootaa dura dhaabbachuufis waraana bobbaasee barattoota oromoo reebsisus barattootni Oromoo gamtaan waraana mootummaa Wayyaanee dura dhaabbachaa jira.Gaaffiin mirgaa barattoota Oromoo Yuunivarsiitii Finfinnee haa deebi’u,Baajatni dhimma barnootaaf bahe olola siyaasa mootummaa wayyaaneef ooluu hin qabu,Mootummaan Wayyaanee garboomfataa dha jechuun Qeerroon Yuunivarsiitii Amboo diddaa irtti fufee jira.Uummatni magaala Amboos waraanni mootummaa Wayyaanee yeroo hundaa maaliif ilmaan keenya dhaana jechuun diddaa dhageessisaa jiran.Yeroo ammaa kana diddaa daran jabaachaa dhufe dura dhaabbachuuf mootummaan wayyaanee hidhaa fi ajjeechaa filachaa kan jiru yoommuu tahu kun ammo haamilee barattootaa osoo cabsiin gaaffiin mirgaa daran jabaatee jira.Yuunivarsiitii Amboo keessatti waraanni mootummaa wayyaanee fi tikni mootummaa wayyaanee mooraa seenuun barattoota olii fi gadi arii’aa jiran.Barattoota Oromoos mana hidhaatti guuruu eegalanii jiran.Barattootnis diddaa nyaata lagachuu gaggeessaa jiraachuun beekame.

Amajjii 07,2012 Naqamte

Godina Wallagga bahaa aanaa Eebantuu magaalaa Hindeetti Goototni barattoota Oromoo, Barsiisotni, Hojjetootni Waajjira Qonnaa aanaa Eebantuu bakka tokkotti walitti dhufuun Amajjii 1 guyyaa WBO Uffata aadaa Oromoon faayamanii sirna miidhagaa fi seena qabeessa ta`een kabajatanii oolan.

Guyyaa kabajaa Ayyaana kanaa ilaalchisee sabboototni Oromoo bara haaraa kanatti dhimma biyya isaanii fi saba isaniirratti akka wal bira dhaabbatanii fi wal gargaaran, haalaa fi bifa kamiinuu taanaan waan dandeenyuun QBO bira dhaabbachuun ga`ee fi qooda dirqama lammummaa keenyaa ba`uu fi raawwachuu qabna jechuun marii walii galaa geggeessan keessatti waadaa waliif galuuniiru.

Haaluma walitti dhufeenyaa fi bakka tokkotti walitti qabamuu sabboonota Oromoo kanarraa sodaa fi birruu guddaa kan qabdu OPDO n humna waraanaa meeshaa guutuu hidhate itti bobbaaftullee sabboototni barattootaa fi barsiisotni mana barumsaa hindee itti roorisa diinaaf utuu hin birratiinii fi hin millatiin sirna kabajaa isaanii haala miidhagaan eegalanii sirnaan xumuuratanii erga namnuu adda adda deemeen duubatti ergamaan Wayyaanee diinummaa fi hammeenya gara malee kan ummata Oromoorratti raawwataa turee fi ammallee ummata hidhaa,reebisisaa fi saamisaa kan jiru ajajaan humna poolisaa aanaa Eebantuu Mokonnoon Raggaasaa Humna Poolisaa baayyinaan Ummatatti bobbaasee ture. Akka kanaan Poolisootni barattoota guyyaa WBO kabajatan qabuuf yeroo bobba’anitti ummanni Oromoo naannichaa fi barattooti wal ta’uun poolisoota of irraa deebisuuf dirqaman. Oromoon ummata nagaa fi qee’ee fi maatii isaa keessatti kabajaa ayyaana fedhe kabajachuuf mirga qaba nurraa deemaa jennaan poolisoonni yeroo diddaa argisiisanii hudhannoon ummataatti bobban gootonni barattooti Oromoo diina meeshaan deemu dhagaan loluun injifatanii of duuba deebisanii jiru.

Haala kanaan ergamtooti diinaa qawwee diinaa baatan sadii93) gara malee miidhamuun Hosptala Giddaa Ayyaanaa fi Laqamteetti akka geefaman gabaasi naannicha irraa nu gahe addeessa.

Baratooti Oromoo haala kana keessatti qabamanii mana hidhaa keessatti dararamaa jiran waan jiraniif diddaan ummataa itti fufee barattoota Oromoo hamma gadi dhiifaman duubatti hin deebinu kan jedhuun hanga ammaa FDG itti fufee jira.

Ummatni Oromoo aanaa Eebantuu iriira mormii ba`e keessatti ,

1. Ajajaa poolisaa jedhamee kan asi jiru Mokonnon Raggaasaa umata keenya akka malee miidhaa jira.mana hidhaatti umma guuree iraarsaa jira. hatatamaan akka inni asii ka`u jechuun gaafataniiru.

2. Miidhaa fi reebicha, saamichaa fi hidhaa sirnaa fi heera malee ummata Oromoo akkasumatti sababa ilaalcha ABO qabdaa fi caasaa ABO keessa jirta ykn ni beekta wkf jechuun nama yakkanii waan qabatamaa fi ragaa hin qabne sobaan nama hidhuun akka nurraa dhaabbatuu fi gochaa akkasii kana irraa poolisootni aanaa kana keessa jiran hundi gara malee ummata keenya miidhaa jiru. waan kana irraa akka dhabbatani jechuun gaafataniiru. Gara Godina wallagga bahattis iyyataniiru.

Xumuura irratti yaada dhaammatan,

1. Hidhaa fi reebicha fedhe kamiyyuu nurratti raawatamu, duuti fedhe kamiyyuu QBO irra duubatti nu hin deebisu!

2. Hanga Bilisummaan Oromoo fi walabummaan Oromiyaa dhugoomtutti mirga keenya ni falamna!

3. Dabaa fi shira mootummaan gabroofataa nurratti hojjetu fi hojjetaa jiru kamiyyuu tole jennee hin fudhannu! Duras ni dhaabbanna!

4. Barataan hidhame kun Obboleessa keenya, ilma keenya! akka inni mana hidhaatii hatattamaan ba`us ni gaafatan. Hanga inni ba`uttis mormii qabannus itti fufna jechuun bariisotnii fi barattootni ejjennoo isaanii ibsaniiru.

Injifannoo Ummata Oromoof!

Bariisota, Baratootaa fi Sabboontota Oromoo aanaa Eebantuu irraa

Wallee Filatamaa Bara 2012

Bara 2012 Keessa Sochii Dargaggoota Biyyoolessaa(Qeerroo)f gumaachi wallee waraaqsaa Artist Hirphaa Gaanfureen kenname kun rakkoo,gidiraa,dhiphinaa fi rooggoo ummata Oromoo irra jiru gahaatti ibsuu irra darbee sochii warraaqsaa Qeerroon gaggeessu keessatti guutuu Oromiyaa irratti faajjii jabduu ta’ee Qeerroon Oromoos ta’e sabboontoti marti caalatti Oromiyaaf ka’anii wardiyyaa akka dhaabatan taasisuu keessatti qooda guddaa kennee jira.

Sababaa wallee kana dhageeffattan jechuu fi bilbila harkaa irratti fe’attanii ummata baadiyyaa ittiin dammaqsaa jirtu jedhuun ergamtooti Wayyaanee dargaggoota hedduu mana hidhaatti guuraniiru. Addattti naannoo Dhiha Oromiyaa Ayiraa Gullisoo jedhamu keessatti barattoota hidhuu irra darbanii manneen barnootaa irraa ari’anii jiru. Qeerroolee arsaa kana kafalan guyyaa tokko seenaan ni yaadata.

Qabsaawaa fi Artist Hirphaa Gaanfurees akkuma wallee kee irratti jette hangamuu Oromiyaa irraa fagaatte qalbii fi onneen kee guyyuu ummata kee bira jiraataa jirtuu fi rakkoon ummata kees guddoo akka onnee si gubu waan beeknuuf jecha  gumaacha ati gooteef maqaa  Sochii Dargaggoota Bilisummaa fi Dimokiraasii Biyyoolessaa (Qeerroo)n Galata guddaa siif dhiheessina.

Amajjii 06,2013 Mattuu

Gaafa Amajjii 04 fi 05,2013   Godina Iluu Abbaa Booraa aanaa Baddaallee fi Magaalaa Baddaallee, Dhiddheessaa, Cooraa, fi Huruummuu keessaatti diddaan Ummataa Jabaatee itti fufe. Sababiin diiddaa ummataa kaase keessaa dabballoonni Wayyaanee maqaa walgahii dhimma nageenyaa fi buusii hidhaa laga Abbayyaa jedhuun ummata walitti qabuuf yeroo yaalanitti ture.

Hidhaa laga Abbayyaa sababa jedhuun daldaluu fi ummatas hiraarsuun yeroo muummicha ministera duraa Mallas Zeenaa lubbuun jirutti ture kana booda waayeen hidhaa laga Abbayyaa ololaa fi karoora dulloomaa waan ta’eef isin hin dhageenyu jechuun ummanni dabballota Wayyaanee irratti ka’uu gabaasi Qeerroo godinicha irraa nu gahe addeessa.

Kana malees dabballoonni Wayyaanee miseensota OPDO ta’anii dammaqiinsa eenyummaa fi siyaasaa hin qabne yaadota dulloomaa mootummichi ittiin ummata bitaa jiruun karoora Mallasaa bakkaan geenya sababa jedhuun ummata hiraasan iyyuu ummanni naanncha garuu karoorri Oromootaa kan bilisummaa fi walabummaa dha jechuun harkatti didaa akka jiran qeerroon gabaasa.

Naannuma kanatti    Amajjii 4,2013 irraa egalee Waraqaan Waamichaa FDG Qeerroon qopheessee magaalaa Baddaallee aanaa Baddaallee, Dhidheessaa, Cooraa,  Hurruummuu, Mattuu, Yuunivarsiitii Mattuu fi Koolleejjii barsiisotaa Mattuu keessaa facaafamuu egalee jiraachuu Qeerroon godinichaa gabaasee jira. Ibsa waraaqaa qeerroo kana keessaattii barreeffaamonnii baratootni Yuunivarsiitii Finfinnee  badii tokkoo malee ukkaaffamaa jiruu haa hiikamaan, gochaa baratootaa Oromoo Finfinneef mootummaan Wayyaanee gaafatamaadha, gaaffiin ummataa Oromoo deebii haa argatu, dargaggoonnii Oromoo fi uummaannii Oromoo hundii baratootaa Yuunivarsiitii Finfinnee dararamaa Waayyaanee jala jiraaniif haa dirmannuu garbummaa waloon nutti fe’amee waloon of irraa haa buusnuu jedhuu kan of irraa qabuu, Qeerroon ummataa qaqqabsiisaa jiraachuu addeessa.

Tarkaanfiin Abdii Kutannaa Mootummaa Itoophiyaa Qabsoo Bilisummaa Oromoo Daranuu Akka Shaffisu Dhiiba

Ibsa Adda Bilisummaa Oromoo

Amajjii 2, bara 2013 irraa eegalee Yuniversiitii Finfinnee Mooraa Kiiloo 4 fi Kiiloo 5 keessatti barattoonni Oromoo fincila qabsiisanii akka jiran beekamaa dha. Fincila barattoota Oromoo kan duraanuu yeroo dheeraaf Oromiyaa mara keessatti deemaa turetu mooraalee yuniversiitii Finfinnee kana keessatti daranuu jabaatee guyyaa eerame kanatti bifa addaatiin dhoowe. Ergamtoonni sirna Wayyaanee akkuma yeroo dheeraaf aadeffatan barruu Oromoo fi Oromummaa arrabsuu fi salphisu mooraa Kiiloo 4 keessatti maxxansuu isaaniitti fufee kan dhoowe incilli barattoota Oromoo kun yeroo ammaa gara dhaabbiilee barnootaa biyyattii adda addaatti akka babalataa jirus beekamaa dha. Guutummaa ibsa kanaa  afaan Oromoo fi Amaaraan dubbisuuf as tuqaa:-

Ibsa ABO Tarkaanfii Fokkisaa Mootummaa Itophiyaa irratti.pdf

Amharic version.pdf

Amajjii 05,2012 Finfinnee

Haalli FDG Oromiyaa guutuu keessatti eegale hamma galii isaan gahutti dhaabbachuu akka hin dandeenye Qeerroon beeksisee jira.Haala kanaan diddaa Yuniversity Finfinnee mooraa Kiiloo 4 keessatti qabate irratti sochiin warraaqasaa itti fufee hanga ammaa sadarkaa mootummaa Wayyaanee yaaddessu gahee jira.Rakkoon barattoota Oromoo fi mootummaa Wayyaanee jidduutti qabate guutuu Oromiyaa keessatti daran jabaatee akka itti fufu beekamaa dha.

Diddaa mooraa kiiloo 4 keessatti ka’e irratti barattooti Oromoo 113 yeroo hidhaman kanneen keessaa barataan Gammachuu jedhamu guyyaa kaleessaa reebichaa loltoota Wayyaanee itti hammaachuu irraan mana yaalaa gahee gootummaan wareegamee jira. Waaqayyo maatii isaa fi qabsaawota Oromoof jajjabina isaa akka laatu Qeerroon dhaammata.

Kanneen hafan hidhaa keessatti yeroo ammaa rakkachaa jiran akka armaa gadiiti.

Barattoota Yuuniversitii Mooraa Kiiloo 4,Finfinne  Irraa Mana  Hidhaa Wayyaanee Galanii dararamaa Jiran!

Barattooti maqaa fi bakki dhaloota isaanii guutuutti hin argamiin 13 gara fuula duraa dhiheessina.

Qabsoon itti fufa Gabrummaan ni kufa!!