Hagayya 06,021
Godina wallagga bahaa aanaa Haroo Limmuu keessatti waraanni mootummaa wayyaanee mana ilmaan oromoo sakatta’insatti gad taa’e.Diddaa naannoo kanatti deemsifamaa jiru dura dhaabbachuuf waraanni wayyaannee manneen lammiilee Oromoo maqaa meeshaa waraanaa qabdu jedhuun sakatta’insaan rakkisaa jira.Uummatni oromoo mana isaa seeraan ala akka hin sakattaane dura mormaa kan jiru yoommuu tahu waraanni wayyaanees meeshaa hidhannoo qabuun ilmaan oromoo dirqamsiisee sakatta’aa jira.
Aanaa Giddaa keessattis haalli wal fakkaataan kan jiru dha.Godina Horroo Guduruu wallaggaa aanaa Jaardagaa Jaartee,Horroo,Amuruu fi Guduruu keessatti uummatni wal gahii wayyaanee lagachuun diddaa jabeessee jira.Waraanni wayyaanee tasgabbii dhabes gidduu galeessa irra gara naannooleetti hedduumminaan rabsamaa akka jiru gabaasi nu gahe addeessa.
Ummanni naannoo fi barsiisonni tokko tokko akka jedhanitti dukkanaan duuba ifatu jira,har’a qe’ee fi maatiin keenya sakata’amus booru kana jalaa baanee ummata walabaan jiraatu ni taana. Mootummaan har’a ummata Oromoo salphisaa jiru yerootti ofii salphatus as dhihoo waan ta’eef nuti qabsoo keenya itti fufna jedhu.

(Qeerroo,Finfinnee, 5 Hagayya 2012) Lammilee Oromoo mana hidhaa Qaallittiitti hidhamanii jiran irratti dararaan Mootummaa wayyaaneen irra gahu hammaataa kan jiruu ta’uun bira gahame. Maddi Qeerroo akka gabaasetti, Oromoonni 69 waggaa darbee Oromiyaa garaagaraa irraa balleessaa tokkoo malee qabamanii hidhaman akka malee hiraarfamaa fi murtii malee beellamaan gidirfamaa akka jiran beekamee jira.
Keessaayyuu, lammiileen Oromoo kunneen erga qabamanii kaasee haga yoonaatti murtii tokkoo malee maqaa qoraannoo qofaan beellamamaa fi mana hidha akeessatti hiraarfamaa akka jiran beekameera. Haalumaa kanaan hidhamtotaa 69 keessaa barattootni Oromoo lamaa akka malee dhukubsatanii kan jiran yoo ta’u haga yoonaatti wal’aansa mana yaalaa dhorkamnii kan jiraan ta’uun hubatameera.
Barattooti kunneen lameenis 1. Barataa Geetachoo Iddoosaa fi 2. barataa Hirphasaa Diriirsaa kanneen jedhaman, dhukkubsatanii otuu jiranii sababa Oromoo ta’aniif yaalaa akka hin arganne godhamanii jiru.
Dhimma kanaan kan walqabates, hidhamtoonni ilmaan Oromoo mana hidhaa Qaallittii zoonii keessatti hidhamnii jiran “hangaa hidhamtoonni dhukkubsachaa jiran waldhaansaa hin argannetti, nyaataa hin nyaannu,” jechuun fincilaa nyaataa lagachuu gaggeessanii jiran.
Haalaa kanaan Mana hidhaa Qaallitii Zone 1,3,6, kessatti diddaan ilmaan Oromoo jabaachaa jiraachun kan beekame yoo ta’u, ergamtooti wayyaanee immoo sababa kanaan hidhamtoota dararaa akka jirtu illee bira gahamee jira.
Mootummaan Wayyaanee fincilaa ilmaan Oromoo kallattii garaagaraatiin belbelaa jiru dhaamsuuf ilmaan Oromoo jumlaan mana hidhaatti guuruu kan aadeffatte ta’uunis beekamaa dha.

Hagayya 05,2012 Naqamte
Ona Habee Dongoroo Bakka Tulluu Gaanaa jedhamutti Hagayyaa 2,2012 Qabeenyaan Investeraa Wayyaanee beekamaa nama maqaan isaa Aksiidoom G/Sillaaseee kan jedhamuu irratti tarkaanfii fudhatame. Ammaan dura Oromoota 1500 ol humnaan qe’ee irraa buqisee lafa cash crop area qabatee qabeenyaa uummataa Oromoo saamaa kan jiru namtichi kun humna hin beekamiiniin qe’ee Oromoota irraa buqisetti qabeenyi isaa Hagayya 1,2012 barbadaayuu gabaafame.
1. Tiraakteroota 4
2. Konkolaataa Isuse FSR lama
3. Magaazinni kuufama midhaan akka Saaliixaa,Nuugii fi gosa garaa garaa kuusee biyya biraatti dabarsu.
Guutuutti barbadaayuu gabaasi naannicha irraa nu gahe addeessa.
Waardiyyaan inveesitera kanaa maqaan Caannee Waaldee Yoohaanniis jedhaamuu tarkaanfii humnii addaa irraattii fudhateen akka malee madaa’ee du’aaf jireenyaa gidduu jiraachuun gabaafamera, Tarkaanfii boonsaa kanattii uummannii akka malee gammadee kan jiruu ta’u Oromoonni laficha irraa buqa’anii qabeenya malee ta’anii arihaman adda addaa haala kana yeroo dhagahan gammachuu irra darbanii akka booyichaan roorroo irra gahe ibsataa turan gabaasi naannciha irraa nu gahe addeessa.

Hagayya 05,2012.
Oromiyaa keessatti diddaan uummataa jabaachaa waan dhufeef waraanni mootummaa Wayyaanee tasgabbii dhabe.Waraana mootummaa Wayyaaneetti dirqamni kenname kan duraanii irra daran jabaachaa waan dhufeef waraannis gara abdii kutannaatti ce’ee jira.Godina Wallagga lixaa aanaa Ayiraa ganda Hoomii fi Kolooboo jedhamn keessatti waraanni Wayyaanee hedduumminaan bobba’uun uummata Oromoo mana hidhaatti guuraa jira.Gaaffii mirgaa uummatni Oromoo gaafatu isin ABOti,Qeerroon isini jechuun dargaggootaa fi abbaa maatii qabanii hidhuun reebichaan dararaa jiru.Ilmaan Oromoo ganda kanneen keessaa 50 ol mana hidhaatti ukkamsuun galgala galgala mana barumsaa sadarkaa 1ffaa ganda Hoomii keessatti lama lamaan guuruun reebichaan dararaa jiru. Yeroo ammaa naannichatti Oromoonni mana hidhaa Wayyaanee keessatti dararamaa jiranis

1. Dargaggoo Gammachiis Mulaatuu
2. Abbaa maatii Mitikkuu Margaa
3. Dargaggoo Efreem Ejjetaa
4. Dargaggoo Lijaalem Yaadataa
5. Abbaa Maatii Abarraa Tarfaasaa
6. Abbaa Maatii Taammiruu Tarreessaa
7. Dargaggoo Lalisaa Margaa
8. Abbaa Maatii Taayyee Tarfaasaa
9. Dargaggoo Habtaamuu Bantii
10. Dargaggoo Gammachuu Bantii
Keessatti argamu.Qeerroon naannoo kanaas hidhaa fi ajjeechaan duuba nu hin deebisu jechuun halkanii fi guyyaa diddaa itti fufanii jiran.Uummatnis wal gahii Wayyaanee lagatee jira.Waraqaaleen dhaadannoo OROMIYAAN NI BILISOOMTI!,GARBOOMFATAAN NI KUFA!, jedhanis ganda hoomii keessatti maxxanfamanii jiran.Qeerroo Oromootti diina tahuun yeroodhaa yerootti rakkisaa kan jiru jala deemaan Wayyaanee Karrasaa Toonee kan jedhamu yoommuu tahu Mana barumsaa Biiftuu keessatti barsiisummaan turee miseensummaa OPDOn liigii dargaggootaa erga seenee booda gara Ijaarsa OPDO keessa kan seene dha. Karrasaa Toonee fi kanneen isa waliin wal fakkaattan wayita Oromoon tokko tahee diina isaa buqqisaa jirutti alagaa jala kurkuruun keessan bu’aan isaa miidhaa fi taajjabbii waan taheef qabsoo Oromootti akka dabalamiin ummanni naannichaa gorsaa fi akeekkachiisa kennee akka jiru Qeerroon gabaasa.

Hagayya 05,2012 Adaabbbaa
Gabaasaa Hagayya 4 godina Baalee, Ona Adaabbaa irraa addeessuun Qeerroon Ona sanaa ifatti baasee sodaa tokkoon malee ifaa fi bilisaan waamicha warraaqsa bilisummaa Oromootti uummata fi barattootaaf waamicha gochaa akka jiru gabaasaan addeessa. Kunis har’a ganamaa eegalee guyyaa guutuu uummannis ta’e barattootni, dargaggoonni ona sanii marti waraqaa qabsoo, dhaadanoo babarreesuudhaan, sirboota qabsoo kaasetta kan manaa qabu gadi yaasuudhaan daandii irratti Teeppii fi moobayilaan sirba qabsoo ona Adaabbaa hamma ganda isaa keessatti wal qabsiisuudhaan sirba qabsoo fi tamsaasa barruuleetiin guyyaa har’aa akka oole gabaasan addeessa. Akkasuma milishootni ona sana irra jiran kaka’umsa kanatti hirmaachaa akka jiran, keesumaa poolisii Oromiyaa ona sanii hidhannaa isaanii hiikkatanii sochii uummataa fi qeerroo kanatti akka hirmaatan qeerroon ona Adaabbaa addeessa. Poolisoota hirmaannaa kanatti makaman maqaan isaanii yeroof baasuu baannus nama 4 akka ta’anii fi warraaqsatti makamuu isaanii ammo ummanni naannichaa akka gammachuu qabu qeerroon beeksisa.
Sochii warraaqsaa kanatti hirmaannan uummataa kan dargaggoo ona sanii akka caalee jiru, namoonni siyaasaa godina sana keessa jiru har’a utuu manatti hin hafin sochii karaa qeerroo eegale kana humna itti gochuudhaan dhaadannoo qeerroon barreessee ona sana irratti tamsaase qabatanii akka dhaadessaa oolan gabaasan addeessa.
Dhaadannoon barreeffame kunis :
BILISUMMAAN SABA KEENYAAAF, DHALA KEENYAAF, BARATTOOTA KEENYAAF, ILMAAN OROMOO WALII GALAAF!!” kan jedhu ture. Akkasuma “INJIFANNOON SABA OROMOOF,INJIFATAMUUN DIINA OROMOOF” jedhanii magaalaa Adaabbaa fi gandoota keessatti akka dhaadeffamaa oole gabaasaan addeessa.

Hagayya 04,2012 Qeellam
Sochii uummataa fi qeerroo ilaalchisee shakkii fi sodaa keessa galuudhaan godina Qellem ,Ona Anfilloo irratti guyyaa lamaan kana bakka buufata jaal Laggasee kan ture Ganda Gargeedaa fi daandii Yattii, gara Yaanqi jedhamu karaa Sudaaniitiin ABOn galeera jechuudhaan mootummaan wayyaanee waraana isaa goodatti guuraa akka jiru qeerroon ona Anfilloo fi Magaalaa Qellem irra jiru gabaasanii jiru. Akka jedhamaa jirutti oni sun buufata waraana wayyaanee ta’ee argame , magaalaan Anfilloo, Muggi ,ganda Gargeedaa,Laaloo Gidaamii,Yaanqii,Yaagaa bakki jedhamu kun waraana wayyaaneetiin marfamee akka jiru gabaasaan har’a Hagayya 3 addeessee jira.
Akkasumas gabaasaa Godina Wallagga dhiyaa,Ona Najjoo,Ganda Warraa Jirruu irraa addeessuun uummanni ganda sanii hedduu dhiphina keessa jiru jedha qeerroon ona sanii irraa gabaasu. Kunis sabababni isaa namoota Tokke-Shan ijaarsa jedhamuun ijaaramaa, hirmaanna misoomaa irratti jabeessaa jedhuun uummata hiriirsaa akka jiru gabaafama. Kunis biqilaa dhaabaa, ajaja gubbaa irraa dhufe bakkaan gahaa jedhanii, miseensa dhaaba OPDOtti ijaaramtan malee fuula duratti lafti isin qabdaniyyuu namoota miseensa keenya ta’anii lafa qonnaa hin qabneef akka kennamu hubadhaa jechuudhaan uummata rakkisaa akka jiran gabaasaan addeessa. Yaanni uummata irraa dhiyaatus mootummaan keessan silas du’aa fi jireenya gidduu jira maaltu akkas isin iyyisiisa, nurraa callisaa dubbii keessaniif deebii nurraa hin qabdan jechuudhaan of irraa callisiisaanii akka jiran har’a Hagayya 3 gabaasaan isaa addeessa.

Hagayya 04,2012 Amboo

Gabaasaaa G/Shawaa Lixaa,Ona Dandii,Ganda Gincii irraa har’a;Hagayya 3 gabaasuun kaleessa Hagayya 2 uummanni ganda kanaa daandii konkolaataa ganda isaaniitti tolchuuf buusii barbaachisu walitti buusuudhaan haala kana irratti marii gachuuf ganama keessaa sa’a 2:30 irratti walitti qabamanii walgayii godhatan. Haata’u malee sa’a sanatti walitti qabama siyaasaa jechuudhaan jala deemtonni wayyaanee ona sanii uummata kana irratti gaaffii kaasuudhaan maaliif akka walitti qabamtan nuuf ibsaa, kaayyoo maaliitiif akka walgayiin kun ta’ame mee nuuf ibsadha, kun yaada biro ka’umsa yeroo waliin wal qabatee jiruudha, dhimma misooma miti jechuudhaan guyyaa kaleessaa guutuu uummata ona kanaa yakkaa akka oolan gabaasaan addeessa. Shakkii kanaan wal qabatee halkan kaleessaa sa’a 8:00 irraa kaasee halkan keessaa jechuudha, daandii magaalaa Amboo fi Naqamte jidduu wal quunnamsiistu guutummaan waraana wayyaaneetiin guutamee akka jiru,bosonni daandii cinaa guutummaan, bakka namni hin jirre mara waraanaan qabamee akka jiru gabaasaan qeerroo ganda Ginci irra jiru addeessee jira. Akka odeessaan jedhutti waan waraanni eegaluudhaaf bakka qabachuuti jedha haalli waraana wayyaanee kanaas, har’a qeerrooleen ona Dandii nama shan shaniin wal gurmeessuudhaan sirboota qabsoo kan akka geerarsa Eebbisaa Addunyaa sirbaa daandiima hidhattootni wayyaanee kun irra jiran irra sirbaa asii fi achi deddeebi’aa oolanii jedha odeessaan ganda sanii. Uummanni hedduu waan rifatee aaree jiruuf sochiin tokko waraana wayyaanee kanaan yoo eegale gara tarkaanfiitti ka’uuf qophii godhanii akka jiran gabaasaan addeessa.
Qabsoon itti fufa!!
Gabrummaan nu kufa!!